Lema do Curso

A MIÑA VIDA: CREA, SOBE, COMPARTE

Teño que recoñecelo. O curso pasado, día a día, actividade por actividade, campaña tras campaña funo experimentando: o nós sempre supera ao eu, que a comunidade mellora ás individualidades por moi poderosas que sexan.... Soubemos que, observando todas as dimensións da persoa, es máis que ti mesmo, máis que o que che venden, máis que o presente… E mirando deste xeito a vida, a miña vida é luz, mensaxe directa e actual, experiencia compartida en plenitude. Acollamos o intento de que os días transcorran por ese camiño.

A miña vida: crea. A vida está chamada a xerar vida. Por iso é tempo de indagar, reflexionar, elaborar tarefas e proxectos. A vida é a suxestión que achega o marabilloso da inquedanza que fai novas todas as cousas, que anima a soñar, a non contentarse co conseguido cando aínda falta tanto para acadar que as vidas se enchan de vida.

“A miña vida crea”. Por iso a vida cos seus dinamismos é capaz de renovar a nosa historia persoal.

A miña vida sobe. A vida ten posibilidades de ascensión, non se sitúa nun só plano. É momento para confrontar os distintos camiños polos que discorre a vida. É momento de buscar outras claves que lle dean á melodía os tons diferentes que a enriquecen e lle permiten ser cantaruxada por todas as voces. É momento de observar outras miradas que ven a realidade desde perspectivas diferentes para incorporar novas miradas e novos horizontes.

A miña vida comparte. É tempo de facer unha nova lectura do que viven as persoas e os grupos inseridos nun mesmo proxecto, cos compañeiros, coas redes sociais que interactúan e obrigan a estar e moverse con criterios propios e contrastados nun mundo sen moitos criterios. É tempo de compartir o traballo do curso, as realizacións das campañas e a implicación de todos e cada un niso que é a nosa vida colectiva.

“A miña vida crea, sobe e comparte”. Por iso a vida é unha opción pola vida en plenitude.

Este ano a vida, “A miña vida”, quere ser un estímulo para dar renda solta á creatividade e ao traballo educativo pastoral. Pero este ano con maior motivo, porque queremos facer memoria agradecida dos 100 anos da chegada dos salesianos á Coruña. Cen anos cheos de moita vida entregada, vida ilusionada e compartida con e a prol da mocidade coruñesa. Velaí o reto hoxe de romper tadas  a pechaduras e apostar pola liberdade do vento, que non deixa de ser a liberdade dos fillos de Deus, o dono e señor da vida.

Ábrese un novo capítulo das nosas vidas. Un capítulo que se realiza no tempo, no curso 2016-2017, pero cuxos logros farán das nosas vidas unha proposta de crecemento, persoal e comunitario, que abrangue a nosa existencia e a do grupo (familia, colexio, parroquia) que nos dá forma. Seguimos sendo e existindo cos outros.

“A miña vida: crea, sobe, comparte”. Haberá que apuntarse a esa vida que xera, transcende, comparte toda a nosa realidade. Queda aberto o prazo de inscrición.